मागे नाही तर पुढे पहा.

 *लूक  १७ : २८-३३.*

        *मागे नाही तर पुढे पहा.*

    *जो कोणी आपला जीव सांभाळण्याचा प्रयत्न करील  तो आपल्या जीवाला मुकेल , आणि जो कोणी आपल्या जीवाला मुकेल तो आपला जीव वाचविल*. 

               *लूक १७:३३*

       *प्रभू येशू स्वतः म्हणत आहे  , " लोटाच्या बायकोची आठवण करा .*   लोटाची बायको म्हटलं की मला रुथची सुद्धा आठवण येते . कारण या दोघीही लोटाशी संबंध असणाऱ्या स्त्रिया आहेत. एक *लोटाची पत्नी* ,  तर दुसरी म्हणजे लोटाला  जो मवाब नावाचा मुलगा त्याच्या स्वतःच्या मुलीपासून झाला होता त्याच्या म्हणजे मवाबी  वंशातील *रूथ* नावाची स्त्री आहे. *एकीने म्हणजे लोटाच्या पत्नीने मागे वळून पाहिलं आणि मोठा अनर्थाला सामोरं जावं लागलं. तर एकीने म्हणजे रुथने पुढेच दृष्टी ठेवली  म्हणून  मोठे प्रतिफळ व मोठा मानसन्मान  तिला मिळाला.*

      सदोम गमोरा सोडताना देवदूताने लोटाला सांगितले होते की मागे वळून पाहू नका . तरीही लोटाच्या पत्नीने मागे वळून पाहिलं आणि ती मिठाचा खांब झाली. पण एवढ्यावरच अनर्थ थांबला नाही तर लोटाच्या मुली आणि लोट यांच्याकडून महापातक घडले. *नीतिमान लोटाच्या वंशात अनितीमान , दुष्ट , व्यसनाधीन , मूर्तीला  मुलाचा बळीअर्पण करणारा असा मवाबी वंश तयार झाला*. मागे वळून पाहण्याने किती भयानक नाश ओढवतो हे विसरू नका.

     मागे वळून पाहणं म्हणजे पुन्हा सदोम व गमोरासारख्या  पातकात पडणे.  मागे वळून पाहणं हे फार धोक्याचं आहे. संकटांची मालिका आणि देवापासून दुरावा हेच काय ते हाती येते . पण याच वंशातील रुथने मात्र जेव्हा नामीच्या प्रीतीपूर्ण वागण्याने जिवंत देवाला जाणले तेव्हा मात्र रुथने  आपली दृष्टी पुढे म्हणजे ह्या जिवंत देवावर , परमेश्वरावर स्थिर केली आणि अतिशय महान प्रतिफळाची , आशीर्वादाची मानकरी ठरली. मत्तयाच्या पहिल्या अध्यायात प्रभू येशूच्या वंशावळीत तीचं नाव आहे. *कारण ती म्हणते नामीला जी  नामी जिवंत देवावर विश्वास ठेवणारी होती की , " तुझा देव तोच माझा देव.*

      प्रभूने आम्हालाही त्या पापाच्या , सदोम, गमोराच्या दलदलीतून बाहेर काढलं आहेच.  आता मागे वळून पाहणे नाही तर फक्त त्या ख्रिस्तावर दृष्टी ठेवून चालत प्रतिफळ मिळवायचं आहे ..

     *कारण मागे वळून पाहण्यात शाप आहेत तर पुढे ख्रिस्ताकडे पाहण्यात आशीर्वाद आहेत. मागे पाहण्यात न्याय तर पुढे पाहण्यात कृपा आहे. मागे पाहण्यात लोट आहे तर पुढे पाहण्यात ख्रिस्त आहे.* 

   *आमचा भूतकाळ कितीही वाईट असला तरी आता आम्हाला ख्रिस्त सापडला आहे . रूथप्रमाणे पूर्ण जिवाने , पूर्ण शक्तीने , पूर्ण बुद्धीने सर्वस्व अर्पण करीत ख्रिस्तावर प्रीति करीत   येशू ख्रिस्तावरच दृष्टी ठेवू.* *मागे नाही तर पुढे ख्रिस्ताकडे पाहू!!*

 *प्रभू येशू रूथ प्रमाणे केवळ तुझ्यावरच दृष्टी ठेऊन आम्ही आशीर्वादीत व्हावे  असे कर.*

       *आमेन*